جوري بكر منتقدة شباب الساحل:بتتكلموا إنجليزي وتعوجوا لسانكم على العمال ليه
بوابة السهم -عبّرت الفنانة جوري بكر عن انزعاجها من تصرفات بعض الشباب في الساحل الشمالي، خاصة لما بيتكلموا بالإنجليزي مع العمال بشكل مبالغ فيه، ووجهت لهم رسالة مباشرة تدعو فيها للبساطة واحترام الآخرين.
قالت جوري، في فيديو نشرته على حسابها عبر إنستجرام، إنها كانت بتكلم ابنها لما واحدة سألتها: “أنتي مش بتكلميه إنجليزي ليه؟”، فاستفزها السؤال وردّت عليه: “إنتي مالك؟ بتدخلي في تربية ابني ليه؟”
ومن هنا بدأت تتكلم عن ظاهرة لاحظتها في الساحل، وهي إن أغلب الناس بيتكلموا إنجليزي حتى في أبسط المواقف. سألت جوري: “ليه لما بنيجي الساحل كلنا بنتكلم إنجليزي؟ ليه مش بنسهّلها على بعض؟ اتكلموا عربي يا جماعة.”
واعترفت إنها كانت بتتصرف بنفس الطريقة زمان، لحد ما صديقتها قالتلها: “لو عايزة تشتغلي وتوصلي في البلد دي، اتكلمي عربي علشان الناس تفهمك وتحسك قريبة.” ومن وقتها بدأت تراجع نفسها وتركّز إنها تبقى طبيعية ومفهومة.
وأضافت: “سهّلوا الدنيا على بعض وعلى الشباب اللي شغالين هنا. بتكلموهم إنجليزي وبتعوجوا لسانكم عليهم ليه؟”
وقالت إنها دلوقتي بقت أم ومسؤولة، وصوتها لازم يوصل من بعيد. ضربت مثال من حياتها اليومية: “بدخل أطلب ساندوتش أو قهوة، ألاقي اللي قدامي بيتكلم إنجليزي، والعمال مش فاهمين، وأنا كمان مش بفهم كل الكلام!”
وأكدت إن الشباب اللي بيشتغلوا في الساحل ناس محترمة وولاد ناس، وبيجتهدوا علشان يصرفوا على تعليمهم أو جوازهم. وقالت: “أنا بحب الناس اللي بتتعب وبتشتغل وبتحس بقيمة الجنيه، وبفرح لما بحس إن الجارسونات والشيفات هما اللي بيحبوني.”
وفي نهاية كلامها، وجهت رسالة للناس: “خليكم رحيمين، اتعاملوا ببساطة وسهّلوا الأمور. مش علشان إحنا في الساحل نتصرف كأننا في كوكب تاني. مينفعش أدخل عيادة ألاقي واحدة لابسة مايوه! يا جماعة، كل حاجة ليها مكانها. راعوا الناس الكبيرة والأهالي، علشان محدش يتهزق بسببنا. وكلموا الناس عربي.”
